३ माघ, कालेबुङ । जातीय अधिकारको लागि दार्जिलिङका खम्बुवान राई समुदायले आन्दोलन घोषणा गरेका छन् । खम्बु राई राइट्स मुभमेन्टले गोर्खा आन्दोलनमा सँगै हिंडेका जनजातिहरुलाई अधिकार दिएपनि दार्जिलिङभरि रहेका ४ लाखभन्दा बढी किरात समुदायलाई वेवास्ता गरिएकोले आन्दोलन गर्नुपरेको जनाएको छ ।
किरात खम्बु राई सांस्कृतिक संस्थान, कालेबुङमा आयोजित किराती नयाँ वर्ष यलोदङ ५०७४ मनाउन आयोजित कार्यक्रममा संस्थानका अध्यक्ष अरुण प्रकाश राईले आफूहरुको सम्मानजनक अधिकारको आवश्यकता रहेको बताए ।
‘पहाडमा १९११ सम्म ९० प्रतिशत किरातीहरु आफ्नै भाषा बोल्थे, अहिले भाषा—संस्कृति दुबै संकटमा परेको’ उनले भने । यद्यपि, आफ्नो आन्दोलन गोर्खाली समुदाय टुक्र्याउने अभिप्रायले नभएको प्रवक्ता सन्दीप कुलुङले उल्लेख गरेका छन् । ‘हामी गोर्खा जातिको फूलबारीमा मौलिक पहिचानसहित अटाउन चाहन्छौं’ उनले भने ।
आन्दोलनका क्रममा पर्चा वितरण, सिलगुढी र कोलकातामा किराती जुलुस, १७ जनवरीमा किराँतीको मागबारे राज्य सरकारसमक्ष ज्ञापनपत्र बुझाउने र १८ जनवरीदेखि कालेबुङमा किराँती युवाको रिले अनसन आयोजना गरिने जनाइएको छ । त्यस्तै, लोकसभा र पञ्चायत चुनावमा सक्रिय सहभागी रही आफ्नो अधिकार सुरक्षित राख्ने पनि बताइएको छ । ‘यदि सरकारले हाम्रो माग सुन्दैन भने चुनाव वहिष्कार गर्ने आँट पनि चाहिन्छ’ मुभमेन्टका केन्द्रीय सदस्य विनेश राईले भने ।